Home > just came up to my mind :) > مجرد قصة

مجرد قصة


 يوم ٢٨ يونيو ٢٠١١ …الساعة ١٢ الظهر …
طفلة نازلة الشارع هي و مامتها… وهي بتعدي الشارع .. موتوسيكل من بتوع  الديليفيري خبطها بصندوق الأكل … البنت وقعت و الشارع كله اتلم و الأم قاعدة تصرخ… جريه بيها على أقرب مستشفى … أبوها سواق تاكسي ، نزل الزبون إلي كان معاه و جري على المستشفى …- بنتي جرالها إيه ؟
– كسر مضاعف ف الرجل اليمين و لازم تعمل عملية دلوقتي و تجمع دموي عالمخ و الوضع خطير لأنه لو اتحرك ممكن ينزل عالقرنية و يسبب عما !!!
– و العمل ؟؟؟
– حنعمل العملية دلوقتي … بس عايزين أكياس دم

نزل الأب يجري زي المجنون … جاب كيس الدم ب أخر ٣٠٠ جنيه فجيبه… و رجع بسرعة …- البنت عاملة إيه ؟
– أسترها يا رب …
– خرجت من العمليات ؟
– أيوة بس محتاجة كيس دم كمان
– هنزل أشوف ممكن أعمل إيه …

نزل الراجل يضرب أخماس ف أسداس مش عارف يعمل إيه … لف على بنوك الدم … يا أما مش لاقيين الفصيلة يا أما لازم الفلوس و مينفعش استبدال…الساعة بقت ١١ باليل و كل شوية مراته تكلمه فالتليفون …
– بطلي عياط يا وليه ؟؟
– مش قادرة، البنت بتضيع مننا
– يا ولية بلاش الكلام ده … أديني بدور على بنوك الدم و المستشفيات و انشاء الله خير
– بسرعة أبوس إيدك
قفل الراجل المكالمة و طلع على بنك الدم إلي جاب منه الصبح…
– مساء الخير
– مساء النور
– عايز كيسين دم علشان بنتي إلي كنت حكيتلك عنها الصبح
– هي عاملة إيه دلوقتي ؟
– ربنا يستر
– بدء الراجل يحضر أكياس الدم… الحساب ٥٨٧ جنيه …
– دول ١٧٠ جنيه تحت الحساب و دي رخصتي و رخصة العربية خليهم عندك ضمان
– الكلام ده ف الشارع يا أسطى مش هنا … و رجع أكياس الدم مكانهم … 
– الراجل بدء يدمع …  طب بنتي بتموت يا ناس أعمل إيه ؟؟؟
– بلاش شغل النسوان ده !!!!!!!!!!!!
ركب الراجل عربيته و طلع بيسوق من غير هدف … و فجأة سمع: زمالك  ..
وقف و ركب الزبون …
–  السلام عليكم …
– و عليكم السلام …
– شفت إلي بيحصل ف ميدان التحرير ؟
– خير
– بيقول في ضرب هناك
– أستغفر الله العظيم … يا بيه و النبي ما ناقص
– ليه بس خير ؟
– إلي فيا مكفيني …
– احكيلي طيب .. أهو حتى تفضفض..
بدء الراجل يحكي حكايته .. و الدموع مالية الكلام … السواق صعب عالزبون بس ماكانش عارف يعمل أي حاجة …
أول ما وصل … طلع فلوس و إدها للسواق …
– معلش يا بيه شوفلي فكة معاك… أنا على فيض الكريم
– أنا مش عايز فكة .. دي حاجة صغيرة كدة تساعدك فالمصاريف …
– عيب الكلام ده يا بيه .. أنا مش بحكيلك علشان تديني حسنة
– مش حسنة صدقني … إمسك بس ..
– يا بيه شوف فكة.. لاحسن و حياة بنتي مش حاخد منك حق العداد أصلا
– إمسك بس …
– يا بيه ماتزودش همي … أنا كل إلي عايزه منك ٢٠ جنيه من مصر الجديدة للزمالك …
و نزل الزبون و مشي السواق
 … و توتة توتة فرغت الحدوتة … !!
Advertisements
  1. No comments yet.
  1. No trackbacks yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: